Mótmæli ekki ætluð börnum

Það er almennt ekki rétt að börn séu höfð með í mótmælum eins og þau fóru fram í gær. Þó að það sé brýnt að þjálfa börn í lýðræðislegri þátttöku voru aðstæður þetta kvöld ekki við hæfi barna, segir Umboðsmaður barna í pistli á vefsíðu sinni.

Umboðsmaður barna segir að réttur barna til verndar eigi að ganga framar rétti foreldra þeirra til að taka þátt í mótmælum. Aldrei beri að nota börn til þess að koma skoðunum annarra á framfæri. Þau eigi rétt á sínum eigin skoðunum og að tjá þær frjálslega.

Umboðsmaður barna segir þó að það geti að sjálfsögðu komið upp að eldri börn vilji sjálf mótmæla. Í því sambandi minnir hann á mikilvægi þess að veita börnum tækifæri til að láta skoðanir sínar frjálslega í ljós og að tekið sé réttmætt tillit til þeirra í samræmi við aldur og þroska. „Auk þess njóta börn sama tjáningafrelsis og fullorðnir," segir Umboðsmaður barna í pistlinum.