Jóhanna: Einkavæðing félagslega íbúðakerfisins mistök

Forsætisráðherra viðurkenndi í gær að einkavæðing félagslega íbúðakerfisins hafi verið mistök. Hún upplýsti jafnframt að þegar hefði verið lagður grunnur að kaupleigukerfi hjá Íbúðalánasjóði.

Fréttastofa Stöðvar tvö hefur undanfarið birt viðtöl við fólk í fullri vinnu en á lágum launum, sem telur sig vart hafa efni á því að leigja félagslegar íbúðir hjá Reykjavíkurborg. Það er fyrirtæki sem er alfarið í eigu borgarinnar, Félagsbústaðir, sem rekur félagsíbúðir í Reykjavík og var breytt í sjálfstætt hlutafélag nokkrum árum eftir að R-listinn tók við völdum í borginni.

Fyrirtækið á hins vegar að standa undir sér og getur ekki boðið mikið lægri leigu en er á almennum markaði. Félagsbústaðir hafa á síðustu tíu árum keypt um 100 íbúðir á ári. Félagslega húsnæðiskerfið eins og það var skilgreint í lögum um Húsnæðisstofnun ríkisins var hins vegar lagt niður árið 1999. Jóhanna Sigurðardóttir forsætisráðherra telur að það hafi verið mistök, eins og fram kom í stefnuræðu hennar í gærkvöldi.

Jóhanna sagði að byggja þyrfti upp heilbrigðan og fjölbreyttan leigumarkað og búseturéttarkerfi.