Þakka björgunarsveitarfólki

Ættingjar Andrésar Tómas­sonar, sem fannst látinn í Kleifarvatni í fyrradag, vilja koma á framfæri innilegum þökkum til lögreglu, björgunarsveita og allra þeirra sem tóku þátt í leitinni með einum eða öðrum hætti.

Í þakkarskeyti segja ættingjarnir að þeir hafi gengið í gegnum erfiðan tíma, sérstaklega vegna óvissunnar um afdrif Andrésar. Það hafi því verið mjög styrkjandi og gott að vita af svo mörgu góðu fólki sem lagði sig fram af einlægni og fórnfýsi til að hann mætti finnast og óvissunni yrði létt af.