Mjög viðkvæmt verkefni framundan

Ekki liggur fyrir hvort 2,8 milljarða gat í fjárhagsáætlun Reykjavíkurborgar fyrir næsta ár verður brúað með niðurskurði í rekstri borgarinnar eða auknum álögum á borgarbúa, segir Dagur B. Eggertsson, formaður borgarráðs, í samtali við Vísi.

„Við erum ekki búin að sjá stöðuna í öllum málaflokkum, hvað svona mikill niðurskurður myndi þýða þar," segir Dagur. Hann segir að ekki verði hlaupið til með ákvarðanir um niðurskurð eða auknar álögur fyrr en fyrir liggi hver áhrifin verði á borgarbúa og þjónustu við þá. „Þetta er allt mjög viðkvæmt og það eina sem liggur fyrir er að þetta verður alls ekki auðvelt," segir Dagur.

Dagur bendir á að málið sé sérstaklega viðkvæmt í ljósi þess að búið sé að skera mikið niður síðastliðin tvö ár í rekstri borgarinnar. Hann segir að það hjálpi til við vinnuna framundan hve gott starfsfólk vinni við stjórnsýslu Reykjavikurborgar. „Við búum að því að eiga mjög gott embættislið og starfsfólk sem er að vinna úti á öllum sviðum við að velta við hverjum steini og hverri krónu," segir Dagur. Þeir sem komi að málinu ætli að vanda sig í þessu og reyna að gera þetta eins vel og hægt er.