Reykjavíkurborg þarf að loka 2,8 milljarða gati

Um 2,8 milljarða króna þarf til að loka fjárlagagati í fjárhagsáætlun Reykjavíkurborgar fyrir næsta ár. Þetta kom fram í bókun Besta flokksins og Samfylkingarinnar á borgarstjórnarfundi í gær.

Í sameiginlegri bókun flokkanna kemur fram að til að undirbúa góðar ákvarðanir sé búið að funda í flestum fagráðum og beðið sé eftir gögnum fyrir aðgerðarhóp og borgarráð til að hægt sé að leggja meginlínur í fjárhagsáætlun fyrir næsta ár. Segja borgarfulltrúar meirihlutaflokkanna að undirbúningur sé í eðlilegum farvegi.

Í bókun borgarfulltrúa Sjálfstæðisflokksins segja þeir hins vegar að engin forgangsröðun eða stefnumörkun liggi fyrir af hálfu núverandi meirihluta um forgangsröðun við vinnu fjárhagsáætlunar á þessu ári. Segja þeir að ítrekuðum fyrirspurnum fulltrúa minnihluta vegna fjárhagsáætlunar næsta árs hafi ekki verið svarað svo heitið geti.