Urða verslunarhöll á meðan kreppan ríkir

Reginn, dótturfélag Landsbankans, sem leysti til sín risavaxna lóð með sökkli að tólf þúsund fermetra verslunarmiðstöð er nú að láta moka yfir allan grunninn.

„Menn hafa ekki sýn á það að það verði byggt ofan á sökkulinn á næstunni og bæjaryfirvöld hafa þrýst mjög fast á að það verði gengið sómasamlega frá þessu," segir Gísli Norðdahl, byggingafulltrúi í Kópavogi,

Sökkullinn undir húsið í Skógarlind 1 var steyptur vorið 2008 að sögn Gísla. Byggingin átti að verða samtals tólf þúsund fermetrar á tveimur hæðum ofan á opnum bílakjallara. Til samanburðar má nefna að byggingin sem hýsir meðal annars stórverslanir Elkó, Intersport og Krónuna þar við hliðina er um tíu þúsund fermetrar. Kvartanir hafi borist frá íbúum í Lindarhverfi vegna þess að lóðin hafi verið ófrágengin um langa hríð.

Verktakafyrirtækið JB byggingarfélag átti lóðina og steypti sökklana. Að sögn Gísla hafði ekki verið ákveðið nákvæmlega hvaða rekstur yrði í húsinu heldur hafi einfaldlega verið rætt um óskilgreinda verslunar- og þjónustustarfsemi. Landsbankinn hafi átt ítök í lóðinni. Í kjölfar þess að JB Byggingarfélag hafi komist í þrot í fyrravetur hafi bankinn leyst til sín eignina fyrir nokkrum vikum. Nú sé hún í umsjá Regins, fasteignafélags bankans, sem staðið hafi sig með prýði gagnvart bæjaryfirvöldum.

„Þeir eru nú að beygja steypustyrktarjárnin og setja grús yfir og ætla að slétta þetta og gera snyrtilegt. Þetta er alfarið á þeirra kostnað," undirstrikar Gísli og bætir við að varnargirðingin umhverfis lóðina verði tekin niður og svæðið opnað. „Næsta vor verður síðan sáð grasi og lóðin gæti orðið bæjarprýði."

Aðspurður segir Gísli um einsdæmi að ræða í Kópavogi þótt mokað hafi verið ofan í nokkra einbýlishúsagrunna. Eftir hrunið hafi menn „úti um allan bæ" lent í töfum á byggingaframkvæmdum og bæjaryfirvöld hafi sýnt tilslakanir. „Þetta eru erfiðir tímar en það þarf alltaf að finna lausn á málunum."

Ekki náðist í framkvæmdastjóra Regins í gær. Gísli segir algerlega óljóst hvað verði um hinn mikla sökkul. Ef til vill verði hann grafinn upp aftur síðar.

„Hugsanlega nýta menn þessar undirstöður fyrir það hús sem þær eru ætlaðar fyrir eða þá að þarna kemur eitthvað allt annað. Nú bíður þetta bara næstu uppsveiflu."