Bifröst og HR ræða sameiningu skólanna

Forsvarsmenn Háskólans í Reykjavík (HR) og Háskólans á Bifröst ræða nú saman um möguleika á nánara samstarfi milli skólanna og jafnvel sameiningu. Þetta staðfesta Magnús Árni Magnússon, rektor á Bifröst, og Ari Kristinn Jónsson, rektor HR, í samtali við Fréttablaðið.

Viðræður um sameiningu hófust í fyrrasumar en þeim lauk án niðurstöðu. Nú hafa skólarnir tekið upp þráðinn á ný. „Það er reyndar ekkert komið út úr því enn þá, en það má ekki tefjast lengi,“ segir Magnús Árni sem telur að niðurstöðu verði að vænta á næstu vikum.

Ari segir að fyrirhugaður niðurskurður á ríkisframlögum til háskólanna hafi hvatt menn til að ræða saman á ný. „Við erum að leita leiða til að vernda háskólastarfið eins og hægt er. Markmiðið er að halda sem bestri kennslu og rannsóknastarfi á landinu. Í okkar samræðum við Bifröst erum við að skoða hvort aukin samvinna eða jafnvel sameining verði okkur til framdráttar varðandi kennslu og rannsóknir. Þannig að við sjáum tækifæri í þessu líka.“

Ekki voru teknir inn nemar í staðnám á fyrsta ári í viðskiptadeild Bifrastar í haust vegna dræmrar aðsóknar. Magnús Árni segir að margar ástæður liggi þar að baki, meðal annars ástandið í þjóðfélaginu. Hann segir góða aðsókn þó hafa verið í fjarnámið, sem gæti að einhverju leyti skýrt minni aðsókn í staðnámið.

„Lagadeildin er til dæmis að koma vel út og félagsvísindadeild líka, þannig að þetta er í sjálfu sér ekkert stóráfall fyrir okkur,” segir Magnús Árni.

Katrín Jakobsdóttir menntamálaráðherra hefur verið upplýst um sameiningarhugmyndir Bifrastar og HR.

„Við í ráðuneytinu höfum hvatt menn áfram til að skoða alla kosti til að ná sem mestum samlegðaráhrifum. Ég hef persónulega hvatt til þess,“ segir Katrín. - þj, -shá