Vuvuzela-lúðrarnir sem hafa orðið heimsfrægir á HM í Suður-Afríku eru nú komnir til landsins.
Á fótboltaleikjum helgarinnar sáust margir skarta þessum eins metra langa lúðri úr plasti en þeir voru til sölu í sölubásum í miðbænum á 17. júní. Mikil umræða hefur átt sér stað um hvort banna eigi hljóðfærið á leikjum heimsmeistaramótsins en leikmenn, þjálfarar og áhorfendur hafa kvartað yfir að heyra ekkert annað en suðið úr lúðrunum. En hvert er viðhorf íslenska knattspyrnusambandsins (KSÍ) til lúðranna og suðsins sem þeim fylgir?
„Það þarf víst svo mikinn kraft til að blása og fá hljóð úr þessum lúðrum að ég er ekki viss um að íslendingar hafi þann kraft í sér,“ segir Geir Þorsteinsson, formaður KSÍ, og hlær. Hann hefur orðið var við þetta en vill ekki meina að nein umræða um bann á hljóðfærinu hafi átt sér stað innan KSÍ. „Það er öll notkun hljóðfæra á fótboltaleikjum leyfileg og þetta er svo nýbyrjað hér að við höfum ekkert rætt um það ennþá.“
Geir segir að engin afstaða verði tekin til vuvuzela-lúðrana fyrr en meiri reynsla er komin á þá. „Persónulega finnst mér þetta suð alveg hræðilega leiðinlegt og mundi frekar kjósa að hlusta á eitthvað annað.“ - áp
