Alcoa um Bakka: Mörgum spurningum ósvarað

Katrín Júlíusdóttir iðnaðarráðherra sagði í fréttum Stöðvar 2 í gærkvöldi að Þingeyingar gætu farið að búa sig undir stóra atvinnuppbyggingu. Áform um orkunýtingu í héraðinu væru komin á það stig að Landsvirkjun gæti fari að gera viðskiptasamninga. Ráðherrann nefndi að Alcoa stæði þar best að vígi enda væri sameiginlegt umhverfismat, sem álver þess hefði verið látið gangast undir, nú væntanlegt.

En hefur Alcoa ennþá áhuga á að reisa þarna álver?

Erna Indriðadóttir, upplýsingafulltrúi Alcoa á Íslandi, segir að fyrirtækið hefði ekki lagt einn milljarð króna í undirbúning verkefnisins nema það teldi að það væri áhugavert. Hún segir að þótt umhverfismatið muni liggja fyrir í síðari hluta næsta mánaðar verði mörgum spurningum enn ósvarað áður en unnt verður að taka ákvörðun.

Hún vill þó ekki tíunda nánar hverjar þær spurningar helstar eru. Líklegt er að þær snúi ekki aðeins að viðskiptalegum þáttum, eins og hvaða verð álver þurfi að greiða fyrir orkuna, hve mikla orku það geti fengið og hvenær, heldur einnig að pólitískum þáttum, eins og hvort ríkisstjórnin muni styðja byggingu álvers á Bakka.

Alcoa áformar að byggja álíka stórt álver við Húsavík eins og það sem er á Reyðarfirði en hefur þó tekið fram að stærðin muni ráðast af orkunni sem fæst. Félagið segir að byggingarframkvæmdir gætu hið allra fyrsta hafist á árinu 2013. Áætlað er að um fimm þúsund ársverk verði til við byggingu álversins en síðan muni þar starfa á bilinu 300 til 450 starfsmenn. Gert er ráð fyrir að í heild skapist á bilinu 650 til 960 störf í tengslum við álverið og á vinnuaflið komið að mestu frá Húsavík og næstu þéttbýliskjörnum.