Nemar í MK og matreiðslumeistarar elda fyrir Rauða Krossinn

Rauði kross Íslands, Menntaskólinn í Kópavogi og Klúbbur matreiðslumeistara hafa gert með sér samstarfsamning um starfsemi neyðarmötuneyta Rauða krossins til að tryggja faglega umgjörð í framkvæmd og rekstri þeirra.

Í tilkynningu frá Rauða Krossinum segir að neyðarmötuneyti séu meðal annars starfrækt tímabundið í fjöldahjálparstöðvum Rauða krossins, þjónustumiðstöðvum almannavarna og í aðstöðu fyrir hjálparlið í kjölfar náttúruhamfara eða annarra alvarlegra atburða.

Samningurinn var undirritaður í Menntaskólanum í Kópavogi í dag. Þar mættu félagar í Klúbbi matreiðslumeistara í fullum skrúða og reiðu fram veitingar í boði MK - hótels og matvælasviðs.

Samningurinn kveður á um gerð handbókar um rekstur neyðarmötuneyta, kortlagningu og flokkun eldhúsa í fyrirfram ákveðnum fjöldahjálparstöðvum og samstarf um faghóp sem getur verið deildum Rauða krossins til ráðgjafar um opnun og rekstur neyðarmötuneyta.

Rauði krossinn sér um þjálfun sjálfboðaliða og ber ábyrgð á rekstri neyðarmötuneytanna. Menntaskólinn í Kópavogi- hótel og matvælasvið á fulltrúa í faghópnum, veitir ráðgjöf um gerð handbókar og hefur eftirlit með öruggri meðferð matvæla.

Þá verður fulltrúi frá Klúbbi matreiðslumeistara í faghópnum sem mun annast um þróun uppskrifta fyrir neyðarmötuneytin og annast eftirlit með eldhúsum, birgjum og flutningsleiðum.