Segir yfirstjórn Orkuveitunnar ekki fara með rétt mál

Tillögur starfsmanna Orkuveitunnar um hagræðingu með skertu starfshlutfalli í stað fjöldauppsagna hafa ekki verið kynntar fyrir eða ræddar af stjórn fyrirtækisins eins og skilja má af umræddri yfirlýsingu samkvæmt yfirlýsingu sem borgarstjórnarflokkur Sjálfstæðisflokksins sendi frá sér.

Í yfirlýsingu Sjálfstæðisflokksins segir: „Eðlilegt hefði verið að tillögur starfsmanna um þetta efni hefðu verið kynntar stjórninni um leið og þær komu fram enda eru til skrifleg gögn um þær. Ýmsar leiðir hafa verið ræddar í stjórninni og þar með talin sú leið að skerða starfshlutfall, hinsvegar hefur aldrei komið fram á stjórnarfundum að starfsmenn hafi lagt fram tillögu þess efnis. Fulltrúi Sjálfstæðisflokksins hefur nú kallað sérstaklega eftir því að umræddar hugmyndir starfsmanna verði kynntar stjórninni.

Í yfirlýsingu yfirstjórnar OR er fullyrt að fordæmalaust sé að einstakir stjórnarmenn boði til funda með starfsmönnum. Það er rangt. Mörg dæmi eru um að einstakir stjórnarmenn boði starfsmenn eða trúnaðarmenn á sinn fund eða hitti þá að máli. Í sumar boðaði núverandi stjórnarformaður t.d. til fundar með starfsmönnum og tóku aðrir stjórnarmenn virkan þátt í fundinum.

Aukafundur stjórnar OR, sem fulltrúi Sjálfstæðisflokksins óskaði eftir, verður haldinn á miðvikudag. Óskað hefeur verið eftir því að þar verði farið yfir hugmyndir starfsmanna um skert starfshlutfall í fyrirtækinu gegn því að ekki verði gripið til fjöldauppsagna en þær hugmyndir hafa enn ekki verið kynntar fyrir stjórninni. Að þessum upplýsingum fengnum, taki stjórn afstöðu til tillögu forstjóra um málið og/eða annarra tillagna, sem fram kunna að koma. Rétt er að benda á að allar ákvarðanir um fjöldauppsagnir í fyrirtækjum eru í eðli sínu mikils háttar, sem eðlilegt er að viðkomandi stjórn þekki til hlítar og taki afstöðu til og ábyrgð á, áður en þær koma til framkvæmda."

Eftirfarandi bókun var lögð fram af fulltrúa Sjálfstæðisflokksins í stjórn Orkuveitunnar sl. föstudag:

Mörg islensk fyrirtæki hafa á undanförnum árum fækkað starfsfólki verulega án þess að gripið hafi verið til hópuppsagna, t.d. með sérstökum eftirlaunasamningum, 10% skerðingu á starfshlutfalli, og tilboði um starfslok til þeirra sem skammt eiga eftir í töku eftirlauna. Að undanförnu hafa slíkar hugmyndir verið ræddar á stjórnarfundum og vel heppnuð dæmi úr atvinnulífinu verið nefnd í því sambandi. Ég harma að meirihluti stjórnar skuli ekki vilja skoða slík úrræði til þrautar. Óskað er eindregið eftir þvi að stjórnendur skoði af alvöru slíkar aðgerðir í því skyni að koma í veg fyrir fjöldauppsagnir eða að minnsta kosti lágmarka fjölda þeirra starfsmanna, sem til stendur að segja upp.