Maður sem innbyrti stíflueyði enn þungt haldinn á gjörgæslu

Karlmaður um fertugt sem innbyrti stíflueyði í teiti um helgina er ennþá haldið sofandi og er í öndunarvél á gjörgæslu Landspítalans að sögn vakthafandi læknis.

Maðurinn innbyrti stíflueyði í teiti í Eskihlíðinni aðfaranótt laugardags. Það er óljóst hvernig hann innbyrti efnið sem er baneitrað.

Tveir karlmenn voru handteknir í gær vegna málsins. Annar var húsráðandi í veislunni en hinn var gestur. Húsráðandinn var svo hnepptur í tveggja daga gæsluvarðahald sem rennur út á morgun. Hinum var sleppt.

Lögreglan hefur lýst eftir vitnum sem voru stödd í veislunni. Nokkur vitni hafa gefið sig fram við lögreglu.

Þegar haft var samband við yfirlögregluþjón hjá rannsóknardeild lögreglunnar á höfuðborgarsvæðinu í morgun fengust þau svör að atburðarás væri enn óljós. Málin gætu þó farið að skýrast síðar í dag.