Ríflega 21 milljón safnaðist

Ríflega 21 milljón króna safnaðist í „Göngum til góðs" landssöfnun Rauða kross Íslands sem haldin var síðastliðinn laugardag.

Alls gengu um 2.500 sjálfboðaliðar, um allt land, hús úr húsi og tókst að banka upp á hjá um 80% allra heimila á landinu. Rauði krossinn segir að sú upphæð sem safnaðist sé nokkuð hærri þegar gengið var til góðs fyrir tveimur árum í hrunvikunni í október 2008. Þá söfnuðust um 18 milljónir króna.

"Við erum þakklát landsmönnum fyrir að bregðast svona vel við og gefa af tíma sínum á laugardegi fyrir gott málefni. Við þökkum einnig þeim sem voru heima fyrir og tóku vel á móti sjálfboðaliðunum," segir Kristján Sturluson, framkvæmdastjóri Rauða kross Íslands, í fréttatilkynningu. „Þetta sýnir mikinn samhug í samfélaginu með meðbræðrum okkar og systrum sem búa við mjög kröpp kjör í Afríku. Það er ekki síður mikilvægt en það fé sem safnaðist," segir Kristján.