Nýjar leiðir í gæðamati á fiski

Fyrsti nemandinn frá Úganda við Háskólann á Akureyri, Lillian Chebet, lauk meistaranámi í auðlindafræði síðasta miðvikudag. Lillian hefur stundað nám sitt síðastliðin tvö ár á Akureyri fyrir tilstuðlan Sjávarútvegsskóla háskóla Sameinuðu þjóðanna (UNU-FTP) eftir sex mánaða þjálfun í Reykjavík.

Meistaraverkefni Lillian ber heitið Rapid (alternative) methods for evaluation of fish freshness and quality og fjallaði um þróun á nýjum aðferðum til að meta fiskgæði.

Verkefnið tengist einnig gæðamati á Nílarkarfa sem veiðist í Viktoríuvatni, stærsta vatni Afríku, en það þekur landsvæði sem er um 65 prósent af flatarmáli Íslands. Um 200 fisktegundir lifa í vatninu og segir Lillian að námsfyrirkomulag sem þetta sé afar nauðsynlegt:

„Ég veit að ég á eftir að verða mikilvæg viðbót í starfsemina í Úganda þegar ég sný aftur heim," segir Lillian, en hún segist hafa öðlast ómetanlega reynslu og þekkingu í náminu sem muni koma heimalandi hennar til góða. Lillian vinnur hjá fiskveiðiþjálfunarstofnun í Entebbe, Úganda.