Áfallahjálpin hefst á Bahama

Íslenska rústabjörgunarsveitin leitaði í rústum hótelsins Montana í miðborg Port-au-Prince á Haítí í gær í von um að finna þar fólk, lífs eða liðið.

„Þar bjó mikið af starfsfólki og fjölskyldum starfsmanna Sameinuðu þjóðanna og annarra hjálparstofnana á svæðinu,“ segir Gísli Rafn Ólafsson hjá björgunarsveitinni. „Hlutverk okkar var fyrst og fremst að aðstoða við að finna það sem við köllum félaga okkar og fjölskyldur þeirra sem eru grafnar þarna í rústunum svo ættingjarnir geti fengið bundið enda á þessa óvissu,“ segir hann. Enginn fannst hins vegar á lífi í rústunum á Haítí í gær.

Gísli sagði í gær að viðbúið væri að sveitin myndi leita fram á kvöld eða nótt í hótelrústunum. Menn væru þó vissulega þreyttir. „Við keyrum okkur samt áfram á voninni um að finna einhvern og hjálpa einhverjum. Það hjálpar okkur að finna þessa aukaorku sem við þurfum,“ segir Gísli.

Síðan er áætlað að fljúga frá Haítí í hádeginu í dag. Komið verður við á Bahama-eyjum þar sem sveitin fær hvíld eftir mikla vinnu og byrjar áfallahjálparferli. „Héðan koma menn með þannig upplifun að þetta er mikil lífsreynsla og það þarf að passa andlega þáttinn alveg jafnvel og þann líkamlega,“ segir Gísli. Búist er við þeim til Íslands á fimmtudag. - sh