Dómnefnd skipuð um nýjan spítala

Álfheiður Ingadóttir heilbrigðisráðherra hefur skipað dómnefnd vegna samkeppni um nýjan Landspítala sem hófst formlega í gær þegar Ríkiskaup afhentu hönnunarteymunum fimm sem urðu hlutskörpust í forvalinu frekari gögn.

Guðrún Ágústsdóttir, fyrrverandi forseti borgarstjórnar og formaður skipulagsnefndar Reykjavíkur er formaður dómnefndar. Í dómnefndinni eru einnig Vilhjálmur Þ. Vilhjálmsson, forseti borgarstjórnar og fulltúar frá Arkitektafélagi íslands, Vekfræðingafélaginu og Háskóla Íslands.

Keppnistillögurnar eiga að liggja fyrir 10. júní næstkomandi og niðurstaða dómnefndar verður kynnt þann 9. júlí. Samkeppnin tekur annars vegar til áfangaskipts skipulags lóðar Landspítala við Hringbraut í heild og hins vegar til útfærslu á 66 þúsund fermetra nýbyggingu spítalans.

Hluti af verkefninu verður einnig að skoða frumhönnun á 10.000 fermetra byggingu fyrir Háskóla Íslands.