Davíð Oddsson: Landsfundur eins og „vorútsala Blómavals“

„Forystumenn Sjálfstæðisflokksins teygðu sig ótrúlega langt á síðasta landsfundi flokksins til að koma til móts við sérsjónarmið fámenns en ágengs hóps í Evrópumálum," segir Davíð Oddsson, annar tveggja ritstjóra Morgunblaðsins, í Reykjavíkurbréfi Morgunblaðsins með Sunnudagsmogganum, en með Reykjavíkurbréfinu sem skrifað er undir fyrirsögninni „Það rofar til í Evrópumálum" birtast stórar myndir af Davíð ásamt gömlum evrópskum leiðtogum eins og Gerhard Schröder, fyrrverandi kanslara Þýskalands og Jacques Delors, fyrrum fjármálaráðherra Frakka og forseta framkvæmdastjórnar Evrópusambandsins.

Í Reykjavíkurbréfinu gagnrýnir fyrrverandi formaður flokksins núverandi forystu harðlega fyrir að hafa sýnt Evrópusinnum í Sjálfstæðisflokknum umburðarlyndi en segir: „Fór það svo að landsfundarfulltrúar tóku málin í sínar hendur og afgreiddu skýra ályktun í málinu. Var hún samþykkt með miklum yfirburðum á fundinum, jafnvel þótt allstór hópur manna greiddi atkvæði með málamiðlunartillögunni af hreinni tillitssemi við forystu flokksins."

Davíð gagnrýnir einnig umgjörð landsfundar flokksins og segir að menn geri sér grein fyrir því að hafi verið „mistök að láta almannatengslafyrirtæki ráða því að umgjörð síðasta landsfundar var látin gefa þá mynd að fundarmenn væru þátttakendur í uppákomu þar sem morgunverðarfundur Viðskiptaráðs og vorútsala Blómavals hefðu verið sameinuð í eitt. Samkvæmisleikir fundarins báru heitið: Hvar er fálkinn? Er Sjálfstæðisflokkurinn að heiman? Slíkur aulagangur og auglýsingastofubrellur eiga heima í Samfylkingunni."

Þá gerir Davíð upp að hluta svokallaða aldamótaskýrslu Sjálfstæðisflokksins frá árinu 1989, en sumir flokksmenn hafa vísað til þessar skýrslu til að reyna að halda því fram að hann hafi verið hlynntur aðild að Evrópusambandinu. Í Reykjavíkurbréfinu talar Davíð um sjálfan sig í þriðju persónu, en hann var borgarstjóri árið sem skýrslan var skrifuð og formaður hóps sem setti skýrsluna saman. Formaðurinn fyrrverandi víkur að skýrslunni með þessum orðum: „Fyrrnefnd skýrsla virðist um margt ágæt, en ekki hefur þó allt það, sem þar var sett fram, staðist tímans tönn, enda skýrslan komin á þrítugsaldurinn. Á þeim tíma hafa allar þær upplýsingar sem áður vantaði komið fram, meðal annars í fjölmörgum samtölum fyrrverandi formanns skýrslunnar í mörgum samtölum við menn eins og Delors, Santer og Prodi, sem allir voru forsetar framkvæmdastjórnar ESB, auk helstu forystu Evrópuríkja. Og það mega þessir forystumenn eiga að þeir létu aldrei eins og Evrópusambandið væri eitthvað annað en það er, eins og æstir íslenskir aðildarsinnar gera iðulega og reyndar byggja allan grundvöll stefnu sinnar á."