Borgarfulltrúi ekki verið víttur áður

Elstu menn muna ekki eftir því að borgarfulltrúi hafi verið víttur áður, segir Ólafur Hjörleifsson, lögfræðingur á skrifstofu borgarstjórnar. Það gerðist þó í gær þegar að Vilhjálmur Þ. Vilhjálmsson, forseti borgarstjórnar, vítti Ólaf F. Magnússon þegar að hann flutti níðvísu um Hönnu Birnu Kristjánsdóttur borgarstjóra.

Vilhjálmur vítti Ólaf samkvæmt 19. grein samþykktar um stjórn Reykjavíkurborgar og fundarsköp borgarstjórnar, en þar segir að ef borgarfulltrúi ber aðra menn brigslum eða víkur verulega frá umræðuefni skuli forseti víta hann.

Ef borgarfulltrúi er víttur tvisvar á sama fundi getur forseti lagt til við borgarstjórn að hann sé sviptur málfrelsi það sem eftir er fundar. Skal sú tillaga borin upp umræðulaust.