Kynntu áherslur ASÍ

Forystumenn ríkisstjórnarflokkanna áttu í dag fund með forystu ASÍ þar sem forsvarsmenn sambandsins kynntu áherslur og ályktanir ársfundar ASÍ.

„Í máli forystumanna ASÍ kom fram, að þrátt fyrir mikil vonbrigði og tortryggni innan raða ASÍ gagnvart stjórnvöldum vegna vanefnda í framvindu Stöðugleikasáttmálans, voru skilaboð ársfundafulltrúanna skýr. Krafist var víðtæks samstarfs og samvinnu stjórnvalda, stjórnarandstöðu, atvinnurekenda og stéttarfélaga á almennum og opinberum vinnumarkaði um það verkefni að auka kaupmáttinn og fjölga störfum,“ segir í frétt á heimasíðu ASÍ.

Þar segir að forsvarsmenn samtakanna hafi lagt áherslu á að forsendan fyrir slíkri víðtækri sátt og samvinnu væri að lífeyrisréttindi allra landsmanna verði jöfnuð, að tryggt verði að allir félagsmenn ASÍ njóti réttinda til starfsendurhæfingar og að byggt verði upp traust milli aðila vinnumarkaðarins og stjórnvalda.

„Fram kom í umræðum á fundinum að ekki liggja fyrir neinar ákvarðanir um það, með hvaða hætti aðildarsamtök ASÍ hyggjast haga samstarfi sínu við gerð næstu kjarasamninga. Svo langt væri undirbúningur kjarasamninga ekki kominn, en ársfundur ASÍ hvatti aðildarfélögin hins vegar til að sameinast um samræmda launastefnu með áherslu á almennar launahækkanir og jöfnun kjara.“

Auk Jóhönnu Sigurðardóttur, forsætisráðherra, og Steingríms J. Sigfússonar, fjármálaráðherra sátu Gylfi Arnbjörnsson, forseti ASÍ, Signý Jóhannesdóttir, varaforseti ASÍ, og Ólafur Darri Andrason, hagfræðingur samtakanna, fundinn.