Dýrafjarðargöng aftur á blað

Hin 550 metra háa Hrafnseyrarheiði er helsti farartálminn á milli íbúa á sunnanverðum og norðanverðum Vestfjörðum. Vestfirðinga hefur því lengi dreymt um að þessi hrikalegi vegur verði leystur af hólmi með jarðgöngum á milli Arnarfjarðar og Dýrafjarðar. Gangamunnar yrðu annarsvegar skammt innan við Dýrafjarðarbrú og Arnarfjarðarmegin rétt utan við Mjólkárvirkjun, sem fæli í sér 27 kílómetra styttingu á Vestfjarðavegi.

Fyrrverandi samgönguráðherra markaði raunar þá stefnu fyrir fjórum árum að vinna við Dýrafjarðargöng skyldi hefjast árið 2011. Eftir hrun efnahagslífsins hafa áform um ný jarðgöng verið sett í biðstöðu og í samgönguáætlun, sem núverandi samgönguráðherra lagði fyrir Alþingi í vetur, var ekki minnst á Dýrafjarðargöng. Einu göngin sem fengu náð hjá stjórnvöldum voru ný Norðfjarðargöng á Austfjörðum, í stað Oddsskarðsganga, með 1.500 milljóna króna byrjunarframlag árið 2012.

En nú eru Dýrafjarðargöng aftur komin á blað því við afgreiðslu samgönguáætlunar frá Alþingi síðastliðinn þriðjudag var bætt inn tíu milljóna króna framlagi næstu tvö árin til undirbúningsvinnu. Í samgöngunefnd Alþingis er litið á þetta sem táknrænt framlag, sem viljayfirlýsingu þingsins um að Dýrafjarðargöng séu ennþá á dagskrá. Hvenær það verður gæti svo skýrst í haust þegar samgönguráðherra kynnir næstu langtímaáætlun til tólf ára.