Fimm mínútur að landa Maríulaxinum - Myndir

Laxveiði í Elliðaánum hófst klukkan sjö í morgun, og venju samkvæmt renndi borgarstjóri fyrir fyrsta laxinn. Nýi borgarstjórinn Jón Gnarr sagðist vera seinheppinn veiðimaður í opinberri dagbók sinni í gær, en það var svo sannarlega ekki að sjá í morgun. Um fimm mínútur yfir sjö hófst hann handa við veiðina, og innan við fimm mínútum síðar beit á fallegur sex punda hængur.

Jón var ekki lengi að landa honum með aðstoð fulltrúa Stangveiðifélags Reykjavíkur og rotaði laxinn svo öruggum höndum. Þetta var fyrsti lax Jóns, en í dagbókinni sagðist hann aðeins einu sinni hafa farið í laxveiði áður. Þáveiddi hann sjóbirting með því að flækja hann í línunni.

Jón mun svo bíta veiðiugga fisksins af eins og vaninn er með Maríulaxa. Hann sagðist ekki kvíða því að bitinn yrði ógeðslegur, enda vanur því að borða sushi.