Tryggvi Þór: Jóhanna þarf að svara fyrir tölvupóstana

„Ég vil fá betri skýringar. Það er eins og þinginu og um leið þjóðinni hafi verið sagt ósatt. Þetta mál er allt saman afar undarlegt," segir Tryggvi Þór Herbertsson, þingmaður Sjálfstæðisflokksins, aðspurður um tölvubréf sem Már Guðmundsson sendi Jóhönnu Sigurðardóttur, forsætisráðherra, í júní í fyrra áður en hann tók við sem seðlabankastjóri.

Deilt hefur verið um það hvort starfsmenn forsætisráðuneytisins hafi gefið Má fyrirheit þegar hann var ráðinn á sínum tíma um að laun hans yrðu ekki skert í samræmi við stefnu ríkisstjórnarinnar. Lára V. Júlíusdóttir, formaður bankaráðs Seðlabankans, vísaði í þessi fyrirheit þegar hún lagði fram í síðasta mánuði þá tillögu í bankaráði Seðlabankans að laun bankastjóra yrðu hækkuð um 400 þúsund krónur. Í umræðum á Alþingi fyrir mánuði sagði Jóhanna að hún eða starfsmenn ráðuneytisins hafi ekki gefið slíkt loforð. Á vef Morgunblaðsins var fullyrt í gærkvöldi að Már og Jóhanna hafi rætt um launakjörin og vísað í tölvupósta sem Már sendi Jóhönnu.

„Ef maður les yfir tölvupóstana þá er voðalega erfitt að komast að annarri niðurstöðu heldur en þeirri að einhver er ekki að segja sannleikann. Hinn möguleikinn er sá að þetta sé einhver risastór misskilningur en það þætti mér nú ótrúlegt," segir Tryggvi.

„Það verður að fást botn í þetta," segir Tryggvi sem á von á því að málið verði tekið upp á Alþingi á morgun. Hann segir að Jóhanna verði að svara fyrir þetta.

„Hún og undirmenn hennar stóðu í þessum samskiptum."

Þá segir Tryggvi að málið sé slæmt fyrir trúverðugleika Seðlabankastjóra og seðlabankastjóra. „Ég vil aftur á móti taka fram að ég tel að Már hafi á engan hátt gert neitt óheiðarlegt og að hann hafi komið algjörlega fram að heiðarleika í þessu máli."