Yfir 300 þúsund manns skoðað Íslands-myndbönd

„Þetta fer gríðarlega vel af stað og við höfum fengið góð viðbrögð vegna myndbandsins," segir Ragnar Gunnarsson, framkvæmdarstjóri auglýsingastofunnar Fíton, sem framleiða kynningarmyndbönd í tengslum við átakið Inspired by Iceland, ásamt Pegasus en meðal leikstjóra er Reynir Lyngdal.

Viðbrögðin hafa ekki látið á sér standa, alls hafa myndböndin verið spiluð 340 þúsund sinnum á vefnum og skilaboðin hafa náð til tveggja milljón notenda á Twitter.

Af þeim 340 þúsund sem hafa spilað myndbandið á netinu eru 215 þúsund í útlöndum. Aðalmyndbandið hefur verið spilað 178 þúsund sinnum, þar af 120 þúsund sinnum utan landsteinanna. Alls eru myndböndin 113, langflest af erlendum ferðamönnum hér á landi. Þá hafa samfélagsvefirnir tekið vel við sér, en verkefnið hefur náð til rúmlega tveggja milljón manna á Twitter.

„Það er verið að dreifa þessum út um allar trissur en það sem meira máli skiptir er að íslensk fyrirtæki taka vel í þetta," segir Ragnar um dreifingu myndbandsins en almenningur er hvattur til þess að dreifa því til vina og kunningja erlendis.

Fyrirtækin hafa tekið vel í átakið að sögn Ragnars sem er verulega mikilvægt að hans mati.

Ragnar er hæstánægður með átakið og afrakstur þess, en meðal hugmyndasmiða er Bragi Valdimar Skúlason, oft kenndur við Baggalút.

„Það er líka gaman að sjá jákvæðnina í kringum verkefnið og allir eru tilbúnir til þess að vinna saman. Og það veitir ekki af jákvæðni og samstöðu á þessum síðustu og verstu," segir Ragnar að lokum.

Efnt hefur verið til þjóðarátaks á milli 13:00 og 14:00. Fólk er þá hvatt til þess að fara inn á heimasíðuna inspiredbyiceland.com og dreifa myndböndunum.