Stjórnmálaflokkum verði bannað að auglýsa í sjónvarpi

Samfylkingin hefur brennt sig illa á því að sækjast eftir og þiggja fé af einstökum fyrirtækjum og fjársterkum hagsmunaaðilum. Það er ljóst að flokkurinn hefur gert afdrifarík og alvarleg mistök með því að láta viðgangast að frambjóðendur öfluðu fjár frá fyrirtækjum, og jafnvel hvetja til þess. Þetta er meðal þess sem fram kemur í skýrslu umbótanefndar Samfylkingarinnar og lögð var fyrir flokksstjórn Samfylkingarinnar fyrr í dag. Nefndin leggur til að flokkurinn beiti sér fyrir því að sjónvarps- og útvarpsauglýsingar stjórnmálaflokka verði bannaðar í aðdraganda kosninga.

„Styrkir frá fyrirtækjum til flokksins eða einstaklinga innan hans geta dregið úr trúverðugleika flokksins og frambjóðenda á hans vegum vegna hagsmunatengsla sem eru óhjákvæmilegur fylgifiskur slíkra styrkja. Styrkir bjóða hættunni heim. Þá er það óeðlilegt að aðilar utan flokksins kosti baráttu innan hans um sæti á framboðslista eða stöður í flokknum," segir í skýrslunni.

Samfylkingin gerði alvarleg mistök

Niðurstaða umbótanefndar er að Samfylkingin hafi gert alvarleg mistök með því að leyfa málum að þróast í það horf að kostnaðarsöm kosningabarátta væri nauðsynleg til að eiga möguleika á að ná sæti ofarlega á framboðslista.

„Bæði flokkurinn og einstakir frambjóðendur hafa þegið styrki sem eru í mótsögn við þá grundvallarreglu stjórnmálaflokka að forðast hagsmunatengsl sem geta rýrt trúverðugleika þeirra. Þessi mótsögn er átakanleg í ljósi þess að Samfylkingin hefur lagt sérstaka áherslu á að stunda vinnubrögð gegnsæis og trúverðugleika. Flokkurinn hefur sóst eftir háum upphæðum frá fjársterkum aðilum í stað þess að leggja áherslu á fjáröflun sem hluta af grasrótarstarfi þar sem einstaklingar leggja flokknum lið með lágum upphæðum."