Helmingur strandveiðibáta braut reglur um hámarksafla

Fjallað er um málið á vefsíðu LÍÚ. „Þau svör sem við höfum fengið frá Fiskistofu staðfesta í raun allar okkar verstu grunsemdir um það stjórnleysi sem einkenndi veiðarnar. Svörin undirstrika einnig það úrræðaleysi sem eftirlitsaðilar stóðu frammi fyrir. Strandveiðarnar hafa búið til stjórnsýslulegan óskapnað. Eftirlit með þeim er jafnmikið og eftirlit með öllum veiðum alls íslenska fiskiskipaflotans allan ársins hring," segir Friðrik ennfremur í frétt á vefsíðunni.

Samkvæmt upplýsingum frá Fiskistofu hafa 224 aðilar þegar fengið tilkynningu um álagningu vegna umframafla. Heildarupphæð álagningar nam um átta milljónum króna. Þá er enn eftir „að leggja gjald á 50 til 70 aðra vegna vegna veiða umfram leyfðan afla í hverri veiðiferð," svo vitnað sé beint til upplýsinga frá Fiskistofu. Þar er um að ræða aðila sem lönduðu beint á markað eða í beinni sölu en öflun gagna þar að lútandi hefur reynst tímafrek.

Í reglugerð um veiðarnar var einnig kveðið á um að lengd hverrar veiðiferðar mætti ekki fara umfram 14 klukkustundir. Óskað var eftir upplýsingum um meðferð þeirra brota en í svari Fiskistofu segir orðrétt:

„ ... reyndist ekki raunhæft að beita sviptingu strandveiðileyfis vegna slíkra brota þar sem meðferð slíkra mála á grundvelli málsmeðferðarreglna stjórnsýslulaga tók lengri tíma en veiðarnar stóðu yfir í hverjum mánuði. Í því sambandi skiptir einnig máli að strandveiðarnar voru stundaðar samkvæmt bráðabirgðaákvæði í lögum um stjórn fiskveiða sem heimilaði og fjallaði einungis um veiðarnar á síðasta fiskveiðiári."