Vill flýta aðildarviðræðum við Evrópusambandið

Ögmundur Jónasson, ráðherra innanríkismála, vill að aðildarviðræðum við Evrópusambandið verði flýtt og niðurstöður þjóðarinnar liggi fyrr fyrir. Þetta sagði Ögmundur Jónasson í viðtali við Heimi Má Pétursson fréttamann Stöðvar 2 í kvöld.

„Ég hef hvatt til þess að þessum viðræðum verði flýtt. Við fáum niðurstöður fyrr en rétt undir lok kjörtímabilsins og fáum niðurstöðuna á borðið og setjum hana fyrir þjóðina. Ég held að það sé hægt að flýta þessu ferli og koma þannig til móts við þær kröfur sem hafa risið innan vinstri hreyfingarinnar - græns framboðs," segir Ögmundur.

Ögmundur segist ekki vera viss um að það sé meirihluti fyrir því í þinginu að draga til baka aðildarumsókn að Evrópusambandinu. „Ég hef ekki breytt minni afstöðu svo dæmi sé tekið," sagði Ögmundur. Hann lagði áherslu á að hann vildi hlusta á varnaðarorð sem hafa komið upp um að Ísland sé komið í aðlögunarferli. Sér lítist ekki á ef svo sé raunin.