Stjórn VR torveldi aðgang að bókhaldsgögnum

Þrír stjórnarmenn VR segjast hafa barist fyrir því að fá aðgang að upplýsingum um fjárreiður félagsins og gert fyrirspurnir og krafist útskýringa á því sem þeim hefur þótt óljóst í þeim efnum. Þeir segja að meirihluti stjórnarinnar torveldi aðgang að mikilvægum gögnum.

„Við þessu hefur meirihlutinn brugðist með því að torvelda aðgang okkar að nauðsynlegum bókhaldsgögnum og upplýsingum og svipt miklum leyndarhjúp yfir meðferð fjármuna félagsins. Við höfum barist fyrir því að fá að rækja skyldur okkar sem stjórnarmenn, en við teljum að á stjórnarmönnum hvíli m.a. skír skylda til að setja sig inn í meðferð fjármuna félaga, enda bera þeir persónulega ábyrgð á slíku gagnvart öllum félagsmönnum," segir í tilkynningu frá stjórnarmönnunum Bjarka Steingrímssyni, fyrrverandi varaformanni, Guðrúnu Jóhönnu Ólafsdóttur og Ragnari Þór Ingólfssyni

Tilkynninguna senda þremenningarnir vegna yfirlýsingar sem meirihluti stjórnar VR samþykkti í gær þar sem harmað að stjórnarmennirnir þrír tengist samtökunum Nýtt Ísland. Samtökum sem beini kröftum sínum að því að brjóta VR niður.

Bjarki, Guðrún og Ragnar Þór segjast ekki vera félagsmenn í samtökunum. „Við höfum hins vegar þegið boð félagsins um að koma á framfæri sjónarmiðum okkar á opnum fundum félagsins á Austurvelli, þar sem m.a. hefur verið barist fyrir opnari og gangsærri stjórnsýslu og upprætingu spillingar. Við kunnum ekki skýringu á því hvers vegna meirihluti stjórnar VR lætur frá sér þá yfirlýsingu um Nýtt Ísland sem fram kemur á vef félagsins , en látum þeim aðilum sem mynda núverandi meirihluta eftir að skýra það á opinberum vettvangi."