Samningaviðræðunum verið slitið

Stjórn Ungra vinstri grænna skorar á ríkisstjórnina að slíta nú þegar öllum samningaviðræðum við hollenska hernaðarfyrirtækið ECA um að það fái leyfi til að halda uppi starfsemi á Íslandi.

Hollenska fyrirtækið áformar að leigja herþotur til heræfinga þar sem þær myndu að öllum líkindum gegn hlutverki óvinavéla í heræfingum NATO-ríkja og bandamanna þeirra. Um umfangsmikið verkefni er að ræða og hefur áður verið greint frá því að ECA Programs ætli að fjárfesta fyrir tugi milljarða hér á landi gangi allt eftir.

„Mögulegur fjárhagslegur ávinningur auk starfa sem kunna að skapast réttlæta ekki á nokkurn hátt að starfsemi fyrirtækis sem þjálfar fólk í að drepa eða limlesta annað fólk sé heimiluð á Íslandi," segir í ályktun frá stjórn félagsins. „Gildir þá einu hvort tækin sem notuð eru hér á landi séu vopnum búin eður ei. Áætlanir af þessu tagi samræmast alls ekki áformum stjórnvalda um að gera Ísland að miðstöð friðar í heiminum."

Stjórn UVG minnir á að Ísland er herlaust land og að Ísland eigi að vera öðrum þjóðum til fyrirmyndar og leggjast alfarið gegn stríðsrekstri. „Þrátt fyrir að Íslendingar þurfi nú að glíma við afleiðingar efnahagskreppunnar eigum við að leita annarra leiða heldur en þeirra sem ganga út á að hagnast á og stuðla að neyð annars fólks."