Þor­steinn Davíðsson: Skilaði sérákvæði í Árbótarmálinu

Þorsteinn Davíðsson, einn þriggja dómara í Árbótarmálinu, skilað sérákvæði í Héraðsdómi Norðurlands eystra í gær þar sem hann vildi sýkna starfsmann Árbótar af fimm ákæruliðum af sex í kynferðisbrotamáli.

Hann var hinsvegar sammála samdómurum sínum um að sakfella manninn fyrir fjórða lið ákærunnar, sem er jafnframt sá alvarlegasti, og snýr að munnmökum og samræði við aðra unglingsstúlkuna.

Starfsmaðurinn fyrrverandi, sem er tæplega fertugur, var dæmdur í tveggja og hálfs árs fangelsi fyrir kynferðisbrot gegn tveimur unglingsstúlkum sem voru vistaðar á Árbót í Aðaldal á meðan hann starfaði þar.

Þorsteinn rökstyður niðurstöðu sína meðal annars með því að maðurinn hafi verið mjög trúverðugur í framburði og eigi að njóta þess. Þá vitnar hann til dóms Hæstaréttar Íslands um að sakfelling eins brots sé ekki til sönnunar um annað lögbrot. Hann bendir einnig á að vafaatriði eigi að falla hinum ákærða í hag.

Hann var aftur á móti sammála meðdómurum sínum hvað refsingu varðar og segir í sérákvæði sínu að niðurstaða sín hefði engu breytt þar um. Þá er hann einnig sammála um upphæð miskabóta fyrir stúlkurnar sem og málskostnað.