Brúðkaupið ævintýri líkast

Brúðkaupsæði Svía nær hámarki síðar í dag þegar Viktoría krónprissessa giftist fyrrum einkaþjálfara sínum, Daniel Westling. Íslensku forsetahjónin eru í Stokkhólmi og færa brúðhjónunum myndarlega glerskál að gjöf. Brúðkaupshátíðin er ævintýri líkust.

Undanfarnar tvær vikur hafa alls kyns ástartákn prýtt götur Stokkhólms. Þar hefur ríkt ástarþema frá þjóðhátíðardegi Svía 6. júní og í dag er hálfgerð þjóðhátíðarstemning í borginni. Tilefnið er að sjálsögðu brúðkaup krónprinsessunnar Viktoríu og fyrrum einkaþjálfara hennar Daniels Westling, en þau ganga í hnapphelduna síðar í dag.

Hátíðahöldin vegna brúðkaupsins eru ævintýri líkust, enda er verðmiðinn á þeim um 330 milljónir íslenskra króna. Í gær voru haldnir hátíðartónleikar í tónlistarhúsi Stokkhólms, þar sem fjölmörg fyrirmenni mættu í sínu fínasta pússi. Tónleikunum lauk á barnakór sem söng til brúðhjónanna, en þá felldi Silvía drottning gleðitár, og krónprinsessan var greinilega hrærð.

Samband brúðhjónanna er jafnframt eins og úr rómantískri skáldsögu. Hinn verðandi prins var almúgamaður sem rak líkamsræktarstöð áður en hann kynntist prinsessunni, en líf hans mun gjörbreytast þegar hann verður hluti af konungsfjölskyldunni.

Eftir brúðkaupið í dag aka brúðhjónin sjö kílómetra leið um Stokkhólm í hestvagni, meðan 20 hljómsveitir leika lög meðfram leiðinni. 6000 hermenn taka sér stöðu víðsvegar um Stokkhólm og 18 orrustuþotur fljúga yfir höfðum brúðhjónanna. 2000 lögreglumenn halda uppi reglu á meðan í stærstu aðgerð lögreglunnar í Stokkhólmi frá upphafi.

Að ökuferð brúðhjónanna lokinni verður svo hátíðarkvöldverður í konungshöllinni, en meðal 500 gesta eru íslensku forsetahjónin og fjölmargir þjóðhöfðingjar og kóngafólk. Forsetahjónin færa brúðhjónunum myndarlega glerskál að gjöf eftir Jónas Braga Jónasson glerlistamann sem er ætlað að endurspegla litbrigði íslenskrar náttúru.