Smáríki þurfa að losna við skuldabagga

Írar hafa staðið frami fyrir sambærilegri áskorun og Íslendingar við að greiða niður skuldir og koma böndum á ríkisfjármál sín. David Croughan, yfirmaður efnahagsdeildar Samtaka atvinnurekenda á Írlandi, var gestur á fundi Samtaka atvinnulífsins um opinber fjármál í vikunni. Hann segir mikilvægt fyrir smáríki að losna við þunga skuldabagga.

"Lítil jaðarlönd verða líka fyrir barðinu á spákaupsmönnum," sagði hann.

David segir Íra hafa náð að minnka fjárlagagat sitt um 8 prósent landsframleiðslu með skattahækkunum og niðurskurði, meðal annars með naflaskoðun á því hvaða þjónustu hinu opinbera beri að veita. Hann segir Íslendinga og Íra geta lært hvor af öðrum hvað ríkisfjármál varðar og segir sveigjanleika á vinnumarkaði skipta miklu máli.

Spurður hvort hann teldi það hafa gagnast Írum að vera í Evrópusambandsins segir hann:

"Það er ljóst að Írar hefðu þurft að glíma við miklar vaxtahækkanir í kjölfar erfiðleika á mörkuðum. Ég hefði ekki viljað vera utan evrusvæðisins."