Vilja rannsókn á lánveitingum til fasteignakaupa

Þingmannanefnd Atla Gíslasonar mælir með því að tillaga um að hefja sjálfstæða og óháða rannsókn á starfsemi Íbúðalánasjóðs verði flutt á næsta löggjafarþingi. Þetta kemur fram í áliti sem nefndin skilaði frá sér í gær. Sigríður Ingibjörg Ingadóttir, þingmaður Samfylkingarinnar og fleiri þingmenn, lögðu til í síðustu viku að slík rannsókn færi fram.

Þingmannanefndin telur nauðsynlegt að skoða málefni Íbúðalánasjóðs í samhengi við lán viðskiptabankanna til íbúðarkaupa. Til að fá heildarmynd af húsnæðismarkaðnum þyrfti einnig að skoða lánveitingar lífeyrissjóðanna til húsnæðiskaupa, en Íbúðalánasjóður, viðskiptabankarnir og lífeyrissjóðirnir hafa verið helstu fjármögnunaraðilar við kaup á íbúðarhúsnæði. Þá telur nefndin að móta þurfi heildstæða stefnu í húsnæðismálum.

Viðskiptabankarnir hófu að lána fé til íbúðakaupa árið 2004. Bankarnir og Íbúðalánasjóður fóru fljótlega að veita allt upp undir 90% lán til íbúðakaupa og hækkaði íbúðaverð verulega eftir það. Fasteignaverð hefur síðan lækkað umtalsvert aftur frá bankahruni og er gert ráð fyrir að það lækki enn frekar.