Ólafur vill leiða VG áfram í Kópvogi

Ólafur Þór Gunnarsson, bæjarfulltrúi og öldrunarlæknir, býður sig fram í fyrsta sæti á lista VG í Kópavogi í forvali flokksins þann 27. Febrúar. Ólafur hefur verið bæjarfulltrúi VG í Kópavogi frá kosningunum 2006 og varaþingmaður flokksins í Suðvesturkjördæmi frá 2009. Hann er uppalinn í Kópavogi, og hefur búið þar stærstan hluta ævinnar. Helstu baráttumál Ólafs eru fjölskyldu- og velferðarmál, málefni aldraðra og gegnsæ stjórnsýsla, að fram kemur í tilkynningu.

„Sveitastjórnarmál snúast um nærsamfélagið, hvernig við viljum byggja það upp og hvernig við viljum búa að börnum okkar og fjölskyldum. Skuldir bæjarins eru gríðarlegar og því krefjast næstu ár annars konar vinnubragða við stjórn bæjarins. Við þurfum að verja hagsmuni barnafjölskyldna, byggja upp öflugari öldrunarþjónustu og auka gegnsæi í stjórn bæjarins. Bærinn þarf að hætta gamaldags hugsunarhætti byggðum á þjónkun við verktaka og áherslu á steinsteypu og einbeita sér að fólkinu sem hér býr. Bærinn er ekki fyrirtæki heldur samfélag um þjónustu og Kópavogur á að vera velferðarsamfélag," segir Ólafur.

„Síðastliðin 4 ár hafa verið mér afar lærdómsrík. Gengi VG hefur vaxið jafnt og þétt undanfarin ár, og flokkurinn á raunhæfan möguleika á að bæta við sig einum, jafnvel tveimur fulltrúum í bæjarstjórn Kópavogs. Ég óska eftir stuðningi til að leiða áfram listann í kosningunum í vor."