Berjast fyrir endurbyggingu Vestfjarðavegar 60

Baráttuhópurinn „Áfram vestur" fagnar því að jarðgöng milli Hnífsdals og Bolungarvíkur opna á morgun en með tilkomu gangnanna batna samgöngur mjög á norðanverðum Vestfjörðum.

Í Áfram vestur eru 13 manns frá Vestfjörðum sem vinna að því að vinna fylgi við endurbyggingu Vestfjarðavegar 60, frá Þingeyri við Dýrafjörð austur að Bjarkalundi í Austur Barðastrandarsýslu.

Meðal félaga eru Kristinn H. Gunnarsson, fyrrrverandi þingmaður, Halldór Halldórsson, formaður Félags íslenskra sveitarfélaga.

Í tilkynningu frá hópnum segir að hann fagni þeim löngu brýnu úrbótum á samgöngum á norðanverðum Vestfjörðum sem þeim fylgir. Hópurinn þakkar Alþingi og ríkisstjórn fyrir að bregðast skjótt við haustið 2005 og taka ákvörðun um göngin þegar ljóst var að aðstæður höfðu breyst og að ráðast yrði án tafar í gerð jarðganga til þess að tryggja öryggi vegfarenda. Kannanir hafa alla tíð sýnt eindreginn stuðning landsmanna við þessa þörfu framkvæmd, sem Vestfirðingar sjálfir hafa einróma staðið saman um.

„Miklu skiptir nú sem fyrr að öllum sé ljós þörfin fyrir brýnar úrbætur í samgöngumálum, að kröfum sé stillt í hóf og ráðdeildar gætt við ráðstöfun opinbers fjár og að góð samstaða sé um hvert skref. Vestfirðingar hafa leitast við að hafa þessi sjónarmið að leiðarljósi og eru þakklátir fyrir mikinn stuðning landsmanna," segja félagar í Áfram vestur

Aðrir félagar eru: Hlynur Þór Magnússon, Reykhólum; Haukur Már Sigurðarson, Patreksfirði; Magnús Ólafs Hansson, Patreksfirði; Ragnar Jörundarson, Patreksfirði, nú búsettur í Hafnarfirði; Eyrún Ingibjörg Sigþórsdóttir, Tálknafirði; Sigmundur Þórðarson, Þingeyri; Sigurður Hafberg, Flateyri; Sigurður Pétursson, Ísafirði; Sigurður Jón Hreinsson, Ísafirði; Eggert Stefánsson, Ísafirði; og Kristmann Kristmannsson, Ísafirði.