Telur niðurfærslu skulda mögulega

Dómsmálaráðherra segist hafa efasemdir um að almenn niðurfærsla skulda væri of þungbær fyrir ríkissjóð. Skoða þurfi málið í víðara samhengi. Forsætisráðherra segir að efnahagsáætlun stjórnvalda og Alþjóðagjaldeyrissjóðsins gæti þurft að taka breytingum verði ráðist í slíka aðgerð.

Forsætisráðherra, dómsmálaráðherra og félagsmálaráðherra funduðu með embættismönnum í gær um mögulegar lausnir á skuldavanda heimilanna. Meðal þess sem stjórnvöld kanna nú, er hvort hægt sé að ráðast í almenna skuldaniðurfærslu, í anda þess sem Hagsmunasamtök heimilanna hafa talað fyrir.

Við spurðum forsætisráðherra eftir fundinn hvort þessi mál hafi verið rædd við Alþjóðagjaldeyrissjóðinn:

„Fjármálaráðherra er nú staddur úti og ég er viss um að þessi mál koma upp þar. Við erum bara að skoða hvað er nauðsynlegt að gera hér fyrir heimili í skuldavanda," sagði Jóhanna.

Jóhanna segir að ef í ljós komi að hægt sé að fara í almenna skuldaniðurfellingu og það sé nauðsynlegt verði það gert. Hún ítrekar að stjórnvöld ráði ferðinni.

„Við myndum þá skoða með AGS hvort efnahagsprógrammið þyrfti að taka lengri tíma, til dæmis ef við erum að fara of hratt í niðurskurðinn eða ef við þurfum að gera meira fyrir heimilin en við töldum hingað til," segir hún.

Ögmundur Jónasson, dómsmálaráðherra, segist hafa efasemdir um þau rök að almenn skuldaniðurfærsla yrði of þungbær fyrir ríkissjóð:

„Ég hef leyft mér að hafa efasemdir um þær stærðir sem hafa verið nefndar. Að skoða málið út frá frosinni stöðu. Við erum með kerfi á hreyfingu, það á við um lífeyrissjóði, bankana og fleira. Ef við gerum ekki neitt og ef ekkert hefði verið gert. Ef greiðsluaðlögun og fleiri úrræði hefði ekki komið til sögunnar væru fleiri komnir í þrot. Hvað hefði það þýtt í tapi fyrir fjármálafyrirtækin? þannig að við þurfum að reikna þetta út með tilliti til kerfis sem er að taka stöðugum breytingum þar sem ein ákvörðun hefur áhrif á aðrar," segir Ögmundur.

Nú er í gangi efnahagsprógramm með AGS. Sérfræðingar hans hafa lagst alfarið gegn almennri skuldaniðurfærslu. Hvaða áhrif heldurðu að slík aðgerð myndi hafa á samstarfið við sjóðinn?

„Ég held að menn þar á bæ myndu vera opnir fyrir skynsamlegum rökum, og við erum að reyna að ná samkomulagi um þessi mál innan okkar þjóðfélags og það er það sem máli skiptir," segir Ögmundur að lokum.