Lögregla hafði hendur í hári Skap-Ofsa

Málningarslettumaðurinn sem lögreglan á höfuðborgarsvæðinu handtók í janúar er hinn sami og gengið hefur undir dulnefninu Skap-Ofsi, samkvæmt heimildum Fréttablaðsins. Málningarslettunum linnti eftir handtöku mannsins.

Rannsókn lögreglu á tölvubúnaði mannsins, tölvum, myndavélum og minniskubbum hefur leitt í ljós að þaðan var meðal annars sent myndband á vefinn YouTube, þar sem sýnd voru hús auðmanna eftir að skvett hafði verið á þau rauðri málningu. Tónlistin sem maðurinn valdi við myndbandið er lag eftir Johann Sebastian Bach, Slá þú hjartans hörpustrengi, sem oft er leikið við jarðarfarir.

Maðurinn sem um ræðir var handtekinn í kjölfar þess að rauðri málningu hafði verið slett á hús í eigu fyrrverandi bankastjóra Kaupþings, Hreiðars Más Sigurðssonar. Það var síðari hluta janúarmánaðar. Þá hafði rauðri málningu verið slett á hús Bjarna Ármannssonar, Birnu Einarsdóttur, Hannesar Smárasonar, Björgólfs Guðmundssonar og húseignir Karls og Steingríms Wernerssona. Loks var heimili Lárusar Welding atað málningu í miðjum gleðskap á föstudagskvöldi.

Maðurinn var í haldi lögreglu nóttina eftir að hann var handtekinn. Auk tölvubúnaðarins fannst á heimili hans eitthvað af málningu. Hann var yfirheyrður daginn eftir og sleppt að því loknu. Nýverið var hann svo aftur kallaður til yfirheyrslu, samkvæmt upplýsingum Fréttablaðsins.

Maðurinn er á fimmtugsaldri og hefur komið við sögu lögreglu áður.

jss@frettabladid.is