Búið að heimsækja 60 prósent heimila

Um það bil 60 prósent af heimilum landsins hafa nú verið heimsótt af sjálfboðaliðum Rauða krossins og fengið frábærar móttökur.

Í tilkynningu segir að enn vanti þó sjálfboðaliða í miðbæinn, Grafarvoginn, Grafarholtið og hluta af Breiðholti, í austurhluta Kópavogs og í nýjustu hverfum Hafnarfjarðar. Söfnunarstöðvar verða opnar fram til kl. 18:00.

Reiknað er með að um 2400 sjálfboðaliðar hafi þegar Gengið til góðs, en Rauði krossinn þarf 3.000 manns til að ná til allra húsa á landinu. Þeir sem sjá sér fært að leggja söfnuninni lið eru hvattir til að fara á söfnunarstöðvar í sínu hverfi, og sértaklega þar sem enn vantar fólk. Rauði krossinn kann þeim miklar þakkir sem þegar hafa gefið af sér dagsstund til að safna fyrir verkefnum félagsins í Afríku.

Fjölmiðlaskvísan Tobba Marinósdóttir, sem tók þátt í auglýsingaherferð Rauða krossins stóð við stóru orðin og gekk Karlagötuna, ásamt kærasta sínum Karli Sigurðssyni, borgarfulltrúa og meðlim Baggalúts. Íslandsmeistarar Breiðabliks gengu svo í Kópavogi.

Rauði krossinn hvetur þá sem ekki eru heima þegar sjálfboðaliða ber að garði að hringja í söfnunarsíma Göngum til góðs. Hægt er að hringja í þrjú símanúmer: 904 1000, 904 3000, og 904 500, og þá bætast við 1.000 kr., 3.000 kr. eða 5.000 kr. við næsta símreikning. Símafyrirtækin taka ekkert fyrir símtalið.