Gengur ekki í lýðræðisþjóðfélagi

Formaður stéttar­félagins SFR, Árni Stefán Jónsson, mótmælir þeirri kröfu Sambands íslenskra sveitarfélaga að starfsfólk svæðisskrifstofa málefna fatlaðra verði skyldað til að skipta um stéttarfélag.

Málaflokkurinn verður um áramót færður undir sveitarfélögin og starfsfólki, sem er í Félagi ráðgjafa og stuðningsfulltrúa, undirdeildar SFR, gert að ganga úr SFR og í starfsmannafélög sveitarfélaga gangi hugmyndir sambandsins eftir. Árni segir að sambandið vilji þvinga fólk til að skipta um stéttarfélög, þvert á fyrri yfirlýsingar.

Hann bætir við að fullyrðing formanns sambandsins í Fréttablaðinu í gær, um að SFR sé fyrir ríkisstarfsmenn og eigi ekki erindi á sveitarstjórnarstigi, sé ekki rétt. Það hafi samið við sjálfseignarstofnanir, hlutafélög á opinberum markaði og Reykjavíkurborg, auk samninga við ríki og þjóni því öðrum en ríkisstarfsmönnum.

„Að flytja 1.200 manns milli stéttarfélaga, gegn vilja þeirra, eru einfaldlega gamaldags vinnubrögð og ganga ekki upp í lýðræðisþjóðfélagi."

Lögum hefur áður verið breytt til að tryggja réttindi starfsfólks við yfirfærslu málaflokka og segir Árni að nú þurfi aðra breytingu til að tryggja rétt félagsfólks.

„Það er pólitískur vilji til þess og sem betur fer fáir eftir, sem telja þá leið að flytja fólk nauðungarflutningi milli félaga ákjósanlega," segir Árni.- þj