Borgaði 200 evrur fyrir stefnumót með ráðherra

Á uppboði sem haldið var í tengslum við ráðstefnunna Driving Sustainability var hægt að bjóða í stefnumót með Katrínu Júlíusdóttur iðnaðarráðherra. Það var Pétur Haraldsson stofnandi Driving Sustainability sem hreppti hnossið. Greiddi hann 200 evrur, sem samsvarar um 30 þúsund krónum, fyrir stefnumótið.

Ráðstefnan sem haldin var hér á landi dagana 16.-18. september, hefur það hlutverk að vekja athygli á möguleikum Íslands í að vera leiðandi í orkumálum og samgöngum í heiminum.

Fjöldi ræðumanna héldu erindi á ráðstefnunni og má þar nefna Chris Bangle fyrrum yfirhönnuð BMW og Ichiro Fukue aðstoðarforstjóra Mitsubishi Heavy Industry, móðurfélags Mitsubishi bílasmiðjanna.

Uppboðið fór fram í dag en þar var einnig hægt að bjóða í vikuafnot af rafmagnsbíl ásamt fleiru. Pétur fær þannig fínan fund með ráðherra til þess að fara vel yfir næstu skref í þessum málum, en ráðstefnan þótti heppnast með eindæmum vel.