Davíð staðfestir orð Wellinks

Davíð Oddsson fyrrverandi seðlabankastjóri staðfestir við Morgunblaðið, þar sem hann heldur nú um ritstjórnartauma, að hann hafi varað Nout Wellink þáverandi kollega sinn í Hollandi við ástandi íslenska bankakerfisins. Þeir Davíð og Wellink hittust á fundi í Basel í Sviss í september 2008 að frumkvæði Hollendingsins og var um trúnaðarfund að ræða.

Wellink greindi hins vegar frá fundinum í yfirheyrslu hjá hollenskri þingnefnd í gær og því segist Davíð geta staðfest frásögn hans. Wellink spurði Davíð um álit sitt á íslenska bankakerfinu og svaraði hann því til að hann hefði af því miklar áhyggjur. Þær áhyggjur lægju raunar í augum uppi, því allir aðdrættir að endurfjármögnun kerfisins hefðu verið stíflaðir í 13 mánuði.

Wellink spurði Davíð þá hvort hann hafi greint íslensku ríkisstjórninni frá þessari skoðun sinni og sagðist Davíð hafa gert það, fyrst í febrúar sama ár og oft síðan.