Sendiherra styður silfurdrengi

Sendiherra Íslands í Austurríki, Stefán Skjaldarsson, ætlar að hvetja silfurdrengina í handboltalandsliðinu til dáða gegn Serbíu á Evrópumótinu í Austurríki á morgun.

„Ég ætla náttúrulega að fara á leikinn. Hann er 150 kílómetra í burtu héðan í borginni Linz en það er ekkert mál að skreppa,“ segir Stefán, sem hefur verið sendiherra í Austurríki í þrjá mánuði. Hann telur það miklu máli skipta að vinna fyrsta leikinn ef vel á að ganga í mótinu. Ekki væri heldur verra að vinna Dani, sem eru með Íslendingum í riðli ásamt heimamönnum í Austurríki. „Ef þeir komast áfram þá komast þeir til Vínar og þá verður styttra að fara á leikina,“ segir Stefán, sem starfar einmitt í Vínarborg.

Spurður segir hann það alveg óvíst hvort hann ætli að heilsa upp á landsliðsmennina fyrir leikinn gegn Serbum. „Ég vil nú helst ekki vera að trufla þá. Kannski tala ég bara við þá í klefanum eftir leik, þ.e. ef þeim gengur vel,“ segir hann í léttum dúr.

Töluverð umfjöllun hefur verið um mótið í austurrískum fjölmiðlum að undanförnu og hefur Stefán fylgst grannt með gangi mála. „Þeir hafa verið með fréttir af sínu liði. Þeir hafa verið að æfa grimmt og þeim hefur gengið nokkuð vel,“ segir hann en býst við því að Austurríkismenn nái ekki að stöðva Íslendingahraðlestina.

Einar Þorvarðarson, framkvæmdastjóri HSÍ, hefur útvegað Íslendingum um 25 miða á leikinn gegn Serbum. Fleiri ætla að mæta á leikina gegn Austurríki og Danmörku eða um 65 til 70 manns. Ekki er flogið beint til Austurríkis frá Íslandi að vetri til og því þurfa handboltaáhugamenn að fljúga til landa á borð við Frankfurt eða Kaupmannahöfn og taka þaðan lest eða nota bílaleigubíla til að komast á leiðarenda. -fb