Enskir gítarleikarar á Rosenberg

Tveir Englendingar verða í aðalhlutverki á Rosenberg um helgina, þeir Tom Hannay og Clive Carroll. Tom Hannay er 24 ára gamall gítarleikari og söngvari, sem hefur verið búsettur á Íslandi í eitt og hálft ár.

Hann hefur spilað á þó nokkrum tónleikum á þessum tíma, til dæmis hjá Hemma og Valda og á Rosenberg. Einnig hefur hann komið fram á tónlistarhátíðum í Englandi. Hann spilar þægindapopp með áhrifum frá Jeff Buckley, James Taylor og Smokey Robinson, svo einhverjir séu nefndir. Tom kom hingað fyrst árið 2008 til að fara á Aldrei fór ég suður-hátíðina á Ísafirði, en heillaðist svo af íslensku tónlistarlífi og landi og þjóð að hann ákvað að setjast hér að í einhvern tíma.

Tom stendur fyrir Íslandsferð Clives Carroll. Sá er 34 ára gamall gítarleikari og lagasmiður, sem hefur spilað á gítar frá blautu barnsbeini. Hann útskrifaðist með hæstu einkunn frá Trinity College í London 1998 og er mikill töframaður með gítarinn. Hann hefur komið víða við, meðal annars spilað fyrir soldáninn í Oman og hefur verið ráðinn af Madonnu til að spila á einkatónleikum. Clive hefur gefið út þrjár plötur sem allar innihalda einungis lög eftir hann. Sú síðasta heitir Life in Colour og fékk mjög lofsamlega dóma eins og hinar plöturnar.

Tom og Clive koma fram í kvöld og annað kvöld á Rosenberg á Klapparstíg. Á morgun bætist Böddi úr Dalton við dagskrána og spilar lög af sólóplötu sem hann gaf út í fyrra.- drg