Braut glas á höfði annars manns

Nokkuð annríki var hjá lögreglunni á Akranesi í nótt. Einn maður var handtekinn á dansleik í bænum en hann braut glas á höfði annars manns. Árásarmaðurinn var fluttur í fangageymslu lögreglunnar en sá sem ráðist var á leitaði sér lækninga á sjúkrahúsi. Hann mun ekki alvarlega særður.

Þá voru tveir teknir fyrir fíkniefnamisferli í bænum í nótt en báðir voru með smáræði af örvandi efnum á sér. Öðrum var sleppt eftir yfirheyrslur en hinn bíður þess að mál hans verði tekið fyrir.

Einn ökumaður var tekinn á Akranesi í nótt ölvaður undir stýri og var hann sviptur ökuskírteininu á staðnum.