Steingrímur og Jóhanna vildu Davíð aftur í pólitík

Davíð Oddsson, fyrrverandi forsætisráðherra og núverandi ritstjóri Morgunblaðsins og Mbl.is, segist hafa verið dreginn aftur í pólitík. Hann segist aldrei hafa lagt til að mynduð yrði þjóðstjórn haustið 2008 og þá segir hann að bloggheimar hafi haft áhrif rannsóknarnefnd Alþingis og skýrslu nefndarinnar. Þetta er meðal þess sem fram kemur í sérstakri áramótaútgáfu Viðskiptablaðsins sem kom út í dag.

Aðspurður hvort hann líti á sig sem þátttakanda í stjórnmálum sem ritstjóri segir Davíð: „Ég ætlaði mér að vera hættur í pólitík þegar ég settist í Seðlabankann en Steingrím og Jóhönnu langaði greinilega svona mikið til að fá mig aftur."



Undir miklum þrýstingi

Í viðtalinu segist Davíð ekki hafa sett Seðlabankann á hausinn og að undarlegt sé að halda slíku fram. Hann segir Seðlabankann hafa starfað eins og aðrir seðlabankar.

„Rannsóknarnefnd Alþingis var undir miklum þrýstingi frá bloggheimum að finna eitthvað á okkur bankastjóranna, þá sérstaklega þennan sem hér situr, en þeir minntust ekki á að Seðlabankinn hefði farið á hausinn."

Þorgerður og Ragnheiður kyntu undir áróðurinn

Davíð segist ekki hafa orðið undir í umræðunni eftir frægt viðtal í Kastljósi haustið 2008 þegar hann sagði ríkið ekki eiga að borga skuldir bankanna. Hann segir að staða Sjálfstæðisflokksins hafi verið veik á þessum tímapunkti og það hafi ekki hjálpað til í umræðunni.

„Sumir þingmenn hans, eins og Ragnheiður Ríkharðsdóttir og Þorgerður Katrín, spiluðu bara undir áróðurinn á sínar trommur enda báðar nátengdar Kaupþingi. Það var þeim ekki til sóma," segir Davíð.

Ætlaði ekki að leiða þjóðstjórn

Þá segist Davíð ekki hafa lagt til á frægum fundi með ríkisstjórninni í lok september 2008 að mynduð yrði þjóðstjórn. Hann hafi ekki ætlað að verða forsætisráðherra í slíkri stjórn. „Ég sagði þó að nú væri ástandið svo alvarlegt, að ef einhvern tíma ætti að mynda þjóðstjórn, þá væri það við þessar aðstæður."

Þetta hafi hann sagt til að sýna fram á hve alvarlegt ástandið væri orðið. „Ég lagði það þó ekki til, þó að Þorgerður Katrín og Össur hafi farið á límingunum og farið að hreyta í mig ónotum eftir fundinn. Síðan hefur auðvitað komið í ljós að Þorgerður Katrín átti mikilla hagsmuna að gæta í bankakerfinu og Össur er auðvitað bara eins og hann er."