Björn Valur tekur gagnrýni ungliðanna alvarlega

Björn Valur Gíslason, þingmaður VG, tekur gagnrýni ungliðahreyfingar flokksins alvarlega. Hann hefði kosið að ungliðarnir kynntu sér forsendur málsins. Björn Valur hefur óskað eftir fundi með forystumönnum hreyfingarinnar.

Landsfundur UVG fór fram í Reykjavík um helgina. Á fundinum var samþykkt ályktun þar sem segir að Björn Valur hafi verið vanhæfur til að taka þátt í starfi starfshóps um endurskoðun á fiskveiðistjórnarkerfinu þar sem hann væri „starfsmaður stórútgerðarinnar Brims." Fundurinn lýsti jafnframt yfir vonbrigðum með þá ákvörðun þingflokks VG að tilnefna Björn Val í starfshópinn.

„Ég tek þessa gagnrýni frá félögum mínum alvarlega og hef óskað eftir því að hitta þau og fara yfir þessi mál," segir Björn Valur og bætir við að betra hefði verið að hitta ungliðanna fyrir landsfundinn þar sem ályktunin var samþykkt. Fundarmenn hafi skort réttar upplýsingar. „Ég hefði gjarnan viljað hitta þau fyrst."