Þrír alvarlega slasaðir eftir mjög harðan árekstur á Reykjanesbraut

Harður árekstur varð á Reykjanesbraut við Álverið í Straumsvík rétt fyrir klukkan tvö í dag. Allar stöðvar slökkviliðs höfuðborgarsvæðisins fóru á staðinn, samkvæmt upplýsingum frá slökkviliðinu.

Áreksturinn var mjög harður, en tveir bílar lentu saman sem komu úr gagnstæðri átt. Fimm voru í öðrum bílnum og einn í hinum. Tveir voru fastir og þurfti að klippa þá út úr bifreiðinni. Öllum hefur verið komið á sjúkrahús og eru þrír taldir alvarlega slasaðir.

Reykjanesbraut var lokað og er búist við því að hún verði lokuð í hálftíma til klukkutíma í viðbót. Miklar tafir eru á brautinni en bílum er hleypt í gegnum hjáleið í skömmtum. Tildrög slyssins liggja ekki fyrir, samkvæmt upplýsingum frá lögreglu.