Þingmenn bera persónulega ábyrgð á uppsögnunum á RÚV

Starfsmenn Ríkisútvarpsins harma þá ákvörðun Alþingis og ríkisstjórnarinnar að skera framlög til RÚV niður um einn tíunda. „Þessi ákvörðun hefur leitt til þess að um fimmtíu starfsmenn Ríkisútvarpsins hafa nú misst vinnuna, bæði fastir starfsmenn og verktakar, í höfuðborginni og á landsbyggðinni. Sérhver alþingismaður ber persónulega ábyrgð á uppsögnunum," segir í yfirlýsingu sem starfsfólk Ríkisútvarpsins samþykkti nýverið.

Þar segir að fáir opinberir starfsmenn hafi orðið jafn illa fyrir niðurskurðarhnífnum síðustu misseri og starfsmenn Ríkisútvarpsins. Þetta sé þriðja uppsagnahrinan á RÚV á stuttum tíma. Að auki hafi starfsmenn stofnunarinnar þurft að sætta sig við launaskerðingu í fyrra fyrstir opinberra starfsmanna.

„Geta Ríkisútvarpsins til að uppfylla lýðræðis- og menningarhlutverk sitt er í hættu. Álagið á starfsfólk hefur aukist meira en góðu hófi gegnir, sem hlýtur að koma niður á gæðum dagskrárinnar," segir í yfirlýsingunni.

Ábyrgðin hvíli algerlega á herðum ríkisstjórnarinnar og Alþingis, sem hefur nú opinberað virðingarleysi sitt fyrir Ríkisútvarpinu, hlutverki þess, starfsfólki og eigendum, að mati starfsmanna stofnunarinnar.

„Starfsmenn Ríkisútvarpsins skora á Katrínu Jakobsdóttur, mennta- og menningarmálaráðherra, Steingrím J. Sigfússon, fjármálaráðherra og handhafa eina hlutabréfsins í Ríkisútvarpinu ohf, aðra ráðherra og alþingismenn að vakna upp af Þyrnirósardoðanum og koma RÚV til varnar."