Ástæða til að skoða stöðu leikskólakennara

Formaður menntamálanefndar Alþingis telur ástæðu til að skoða stöðu leikskólakennara. Vísir greindi frá því í síðustu viku að nánast hvergi á landinu tekst að fullmanna stöður á leikskólum með fagmenntuðum leikskólakennurum. Ástandið gæti versnað því að umsóknum um leikskólakennaranám virðist fækka.

Nám í leikskólakennarafræðum og grunnskólakennarafræðum var nýlega lengt úr þremur árum í fimm ár. Oddný G. Harðardóttir, formaður menntamálanefndar Alþingis, segist ekki geta fullyrt að lenging námsins sé ástæða fyrir því að ekki tekst að manna stöður. „Ég þori bara ekkert að fullyrða um það," segir Oddný.

Hún segist hafa mikinn áhuga á því að kanna mál leikskólanna gaumgæfilega „Það skiptir miklu máli fyrir starfið í leikskólunum að þar sé vel menntað fólk. En við höfum átt í þessum erfiðleikum jafnvel þó að námið hafi bara verið þriggja ára," segir Oddný. Hún telur að skoða þurfi vel hvers vegna ekki tekst að manna stöður á leikskólunum. „Kannski er skýringanna að leita í öðru en lengd námsins. Það gæti verið eitthvað varðandi starfsaðbúnað eða kjör," segir Oddný. Hún segir þó ekki svigrúm til þess að bæta kjör leikskólakennara núna. „Ég held að það sé lítið svigrúm til að bæta kjör yfirleitt - núna í kreppunni," segir Oddný.