Meirihluti stjórnar VR styður Ragnar áfram

„Eftir mjög snarpar umræður um málið varð niðurstaðan sú að Ragnar Önundarson nýtur trausts meirihluta stjórnar VR til áframhaldandi starfa fyrir félagsmenn VR," segir Bjarki Steingrímsson, stjórnarmaður í VR. Á stjórnarfundi í gær lagði hann fram tillögu um að Ragnar Önundarsonar myndi víkja úr ábyrgðarstöðum sem hann gegnir fyrir hönd félagsins sem varformaður stjórnar lífeyrissjóðs verslunarmanna og sem stjórnarmaður í Framtakssjóði Íslands.

Vísir greindi frá því í gær að Bjarki myndi leggja tillöguna fram á fundinum.

„Þess ber að geta að formaður VR, Kristinn Örn Jóhannesson, var sá er mælti með að Ragnari Önundarsyni til starfsins í upphafi. Væri ekki eðlilegast að viðhafa góða stjórnarhætti og formaður viki á meðan á afgreiðslu málsins stæði, sökum tengsla þeirra?," spyr Bjarki.

„Þess ber einnig að geta að 2 stjórnarmenn sem greiddu gegn tillögu minni sitja einnig í stjórn lífeyrissjóðs verslunarmanna, bæri þeim ekki einnig að víkja til að viðhafa góða stjórnarhætti? Eru það vonbrigði hversu lítinn hljómgrunn krafa félagsmanna um siðbót fær hjá forustu félagsins. Sú krafa er ekki bara hávær frá okkur almenningi, því eins og fram kom í máli forseta Alþýðusambandsins, Gylfa Arnbjörnssona á fundi stjórnar VR í gær, þá krefst ASÍ siðbótar í viðskiptalífinu. Ekki er krafist breytinga á málefnum er snúa að siðbót við stjórnarhætti í lífeyrissjóðum landsins eða verkalýðshreyfingunni sjálfri," segir Bjarki.

Kristinn Örn Jóhannesson, formaður VR, hefur einnig sent frá sér yfirlýsingu vegna málsins.