Krefst afsagnar Ragnars úr stjórn lífeyrissjóðs verslunarmanna

Bjarki Steingrímsson, stjórnarmaður í VR, leggur til að Ragnar Önundarson segi af sér sem varaformaður stjórnar Lífeyrissjóðs Verslunarmanna þar sem hann starfaði sem framkvæmdastjóri Kreditkorta þegar fyrirtækinu var gert að greiða 185 milljóna króna stjórnvaldssekt.

Sektin kom til vegna þátttöku Kreditkorta í samkeppnishamlandi brotum á markaði. Kreditkortafyrirtækjunum, Kreditkort, Fjölgreiðslumiðlun og Greiðslumiðlun var gert að greiða alls 735 milljónir króna í sektir fyrir brot sín.

Bjarki kemur til með að leggja fram tillögu um afsögn Ragnars á stjórnarfundi VR síðar í dag en Ragnar situr í stjórn lífeyrissjóðsins fyrir hönd VR.

Í tillögu þeirri sem Bjarki leggur fyrir stjórnarfundinum:

„Vart þarf að nefna að félagsmenn VR, jafnt og aðrir landsmenn sem og fyrirtæki, hafa greitt þessa sekt með auknum álögum á kreditkortum og annarri þjónustu sem greiða þarf fyrir til að geta þjónustað korthafa og sölu aðila á landinu.

Að ofantöldu nefndu, er það eindregin ósk stjórnar VR, að Ragnar Önundarson segi sig frá trúnaðarstörfum er hann gegnir fyrir hönd VR. Jafnt í stjórn Lífeyrissjóðs Verslunarmanna sem og úr stjórn Framtakssjóðs Íslands, enda telur stjórn VR að traust og trúverðugleiki verði ekki byggt upp á Íslandi með Ragnari Önundarsyni og hans líkum í ábyrgðarmiklum trúnaðarstörfum fyrir hönd félagsmanna okkar.

Óskar stjórn VR eftir því, að varaformaður stjórnar Lífeyrissjóðs Verslunarmanna sýni okkur þennan skilning með afsögn sinni nú þegar."

Fregnum af afstöðu stjórnar VR til tillögu Bjarka má vænta síðar í dag.

Bjarki er fyrrverandi varaformaður stjórnar VR en stjórnin samþykkti tillögu um vantraust á Bjarka sem varaformann í desembermánuði. Ástæðurnar voru trúnaðarbrestur og samstarfsörðugleikar.

Að mati stjórnar tók steininn úr þegar Bjarki hélt ræðu á útifundi á Austurvelli þann 5. desember þar sem hann lítilsvirti ekki eingöngu störf eigin félags heldur verkalýðshreyfingarinnar í heild sinni, að fram kom í tilkynningu sem stjórn VR sendi frá sér í desember.